2025/03/25
Berdintasun departamentuak apirilean zehar hainbat ekimen garatu ditu adiskidetasunaren gaia lantzeko. “Tratu onak landu genituen azaroan eta prozesu horretan konturatu ginen oso garrantzitsua dela emakumeen artean sortzen den babesa, indarra eta laguntza, emakumeak izateagatik dauzkagun arazoei aurre egiteko”, azaldu du Gloria Vazquez (PSE-EE) Berdintasun zinegotziak. “Normalean, bikote arteko harremanak erdigunean jartzen ditugu baina, orain, hausnarketa egin nahi dugu emakumeen arteko adiskidetasunari buruz, erlazio horrek emakumeon bizitzetan betetzen duen funtzioari buruz eta honek feminismoan daukan garrantziaz ohartarazteko”.
Interesgarria da emakumeak nola saretzen diren ikertzea eta honen beharra aldarrikatzea ahalduntzeko bidean, baita indarkeria matxistaren aurka elkarlanean jokatzeko ere eta, zentzu horretan, ahizpatasuna (sororitatea) emakume desberdinen arteko genero-itun politikoa dela esan daiteke.
Honela, Berdintasun departamentuak proposaturiko bi ekimenek ahizpatasunaren eta adiskidetasunaren kontzeptuak landuko dituzte bi ertz desberdinetatik. Lehenik eta behin, mahai inguru bat antolatu da, marko teoriko bat jartzeko, eta ondoren, antzerkiaren bitartez, lagun harremanetan sakontzen jarraituko da.
Apirilak 2, asteazkena -> “Bakarrik lo ez, lagunekin bai!”: Adiskidetasunaren inguruko hausnarketak feminismotik.
Hitzaldia: Marta Lujana eta Miren Guillo.
Elkarrizketatzailea: Onintza Legorburu.
18:30 – 19:30, Emakumeen* Etxea.
Apirilak 9, asteazkena -> “Promesa berdina egiten diegu lagun guztiei” antzezlana.
Aktoreak: Intza Alkain eta Maite Aizpurua.
Sarrera: 6,5 € (aldez aurretik erosteko aukera izango da Kutxabanken sarrera plataforman).
19:00etan, Modelo Aretoa.
