2025/03/27
Zarauzko Udalak 2013an onartu zuen erakundeen arteko lehen protokoloa, indarkeria matxistaren biktima diren emakumeei arreta ematen dieten erakundeen arteko koordinazioa errazteko. “Ordutik, Berdintasun Sailak koordinatzen du erakunde arteko mahai hori, eta, bertan, Berdintasunaz gain, Zarauzko Udaleko Gizarte Politiketako eta Herritarren Segurtasuneko sailek, Ertzaintzak eta Osakidetzak ere parte hartzen dute, Osasun Mentaleko Zentroaren ordezkaritzarekin”, adierazi du Gloria Vazquez Berdintasun zinegotziak (PSE-EE).
Orain, 2025ean, protokoloa berrikusteko eta eguneratzeko prozesu bat egin da, legeria berrira egokituz. Prozesu hori ostegun honetan amaitu da, martxoaren 27an, parte hartzen duten erakunde guztiek indarkeria matxistaren biktima diren emakumeei arreta emateko Erakundeen arteko II. Lankidetza Protokoloa sinatu dutelarik.
Honako hauek sinatu dute akordio berri hau: Xabier Txurruka, Zarauzko alkatea; José Agustín Agirre Aranburu, Donostialdeko ESIko zuzendari gerentea; Xabier Peña Coca, Urola Kostako ertzain-etxeko komisario burua; eta Andrea Gabilondo Cuellar, Gipuzkoako Osasun Mentaleko Zuzendari kudeatzailea. Gainera, sinadura ekitaldian izan dira Gloria Vázquez, Berdintasun zinegotzia; Jesus Arana, Gizarte Politiketako zinegotzia; eta Gervasio Gabirondo, Herritarren Segurtasuneko zinegotzia, protokoloan parte hartu duten arduradun teknikoekin batera.
“Beste behin ere, Zarautz aitzindaria da berdintasun-politiketan, eta beste urrats bat eman du indarkeria matxistaren prebentzioan aurrera egiteko eta biktimei ematen zaien arreta hobetzeko. Azken batean, indarkeria matxistarik gabeko udalerria lortzeko borrokan. Protokolo hori arreta-zerbitzu publikoen eskura dagoen tresna bat izango da, biktimei harrera eta arreta hobea egin ahal izateko. Zerbitzuen arteko koordinazioa hobetzea ere izango du helburu, emakumeen birbiktimizazioa saihestuz”, gaineratu du Vazquezek.
Erakunde arteko II. Protokolo hau egiteko prozesuan, erakunde sinatzaileez gain, Zarauzko ikastetxeek, Gazteria, Kirol eta Hezkuntza departamentuek eta indarkeria matxista jasan duten emakumeek parte hartu dute. Izan ere, hainbat elkarrizketa egin dira emakume hauekin, haien errealitatea eta kezkak zuzenean ezagutzeko. Protokolo horretan indarkeria matxistaren kontzeptua zabaltzea jasotzen da, emakume biktimei babesa ematen dieten pertsonen aurkakoa barne hartzen baitu, bai eta haien inguru hurbil edo afektiboaren aurkakoa ere, bereziki seme-alaben edo beste senide batzuen aurkakoa, emakumea mintzeko borondatearekin.
