2026/10/15
Zarauzko Udalak Yoanna Acedo, 2025eko urriaren 15ean Zarautzen eraildako emakumea, omentzeko ekitaldia antolatu du urriaren 24an, larunbata, 12:00etan. Topaketa Udaletxeko Pleno Aretoan izango da, eta biktimaren senitartekoak eta lagunak izango dira bertan.
Berdintasun Sailak antolatu du ekitaldia, familiarekin lankidetzan, eta Yoannaren oroimena bizirik mantentzea eta Zarauzko emakume bat bere udalerrian bertan erail zutela gogoraraztea du helburu. Halaber, maite ditugun pertsonak oroitzeko, aitortzeko eta laguntzeko gunea izan nahi du, baita indarkeria matxistaren aurrean konpromiso kolektiboa berresteko aukera ere.
Udalak herritar guztiak gonbidatzen ditu omenaldi honetan parte hartzera. Indarkeria matxista ez da kanpoko arazo bat, ezta biktimei eta haien inguru hurbilenei soilik eragiten dien gai bat ere; gizarte osoari eragiten dio, eta erantzun irmoa eta partekatua eskatzen du.
Ekitaldi horren bidez, Berdintasun Sailak azpimarratu nahi du beharrezkoa dela eremu guztietatik lan egiten jarraitzea gure gizartean errotuta jarraitzen duen matxismoa desagerrarazteko, indarkeria matxista mota guztien oinarria baita. Prebentzioa, berdintasunean heztea, eta erakundeen eta herritarren sentsibilizazioa eta konpromisoa funtsezkoak dira emakumeen aurkako indarkeriarik gabeko gizarterantz aurrera egiteko.
“Yoanna Acedo gogoratzea, halaber, Zarautzek berdintasunarekin eta emakume izateagatik beldurrik ez izan eta indarkeriarik jasan behar ez duen gizarte batekin duen konpromisoa berrestea da. Bere memoriak presente jarraitu behar du, eta bultzada gisa balio behar du elkarrekin lan egiten jarraitzeko, indarkeria matxistaren sustraiak desagerraraztea ahalbidetuko duen eraldaketa sozial baten alde”, adierazi du Gloria Vazquez (PSE-EE) Berdintasun zinegotziak.
Zarauzko Udalak dei egiten die herritarrei omenaldiarekin bat egin dezaten eta Yoannaren familiari eta lagunei memoriarako eta konpromiso kolektiborako gune honetan lagun egin diezaieten.
