2023/11/16
Joan den astean indarrean sartu zen pasa den urriaren 28ko Udalbatzak onartu zen Zarauzko Udalaren Berdintasun Ordenantza berria. “Zarautz bigarren udalerria izan zen, Tolosaren ondoren, 2017an berdintasunerako ordenantza bat garatzen, eta aurtengo urriko osoko bilkuran aho batez onartu genuen ordenantza hori aldatzea, azken legeetara egokitzeko”, adierazi du Gloria Vazquez (PSE-EE) Berdintasun zinegotziak. “Duela 6 urte ordenantza aurrerakoia izan zen eta egokitzapen honekin are gehiago. Zarautz udalerri aitzindaria da berdintasunaren arloan, eta, bultzadaren arduradun politikoa naizen aldetik, bereziki harro nago”.
Ordenantza honek genero-ikuspegia politika eta jarduera guztietan txertatzeko betebeharra ezartzen du, desberdintasunak ezabatzeko eta emakumeen eta gizonen arteko berdintasuna sustatzeko helburua betetzeko. Adibidez, soldata-arrakala saihesteko irizpideak sartzen ditu, haurdunaldi edo erditze bat arrazoi izan ez dadin oposizio batera ezin aurkezteko edo Udalaren kontratazio-pleguetan berdintasun-klausulak sartzeko. Plegu hauetan baloratu ohi den irizpideetako bat, hain zuzen ere, emakumeak plantillan egotea da, enpresak emakumeak kontratatzera bultzatzeko, bereziki oso maskulinizatuta dauden sektoreetan, hala nola eraikuntzan.
“Gure gizarteak urrats bat eman behar du berdintasunean aurrera egiteko, eta administrazio publikoak behartuta gaude beharrezkoak diren aldaketa sozialak bultzatuko dituzten neurriak hartzera, eta hori da, hain zuzen ere, onartu berri dugun Berdintasun Ordenantzaren espiritua”, gehitu du Parekidetasun zinegotziak. “Emakumeok mota guztietako lanbideetarako sarbidea izan behar dugu, gizonekiko berdintasun-baldintzetan, gizartean eta enpresetan dugun inplikazioa areagotzeko; azken batean, berdintasunezko gizartea lortzeko. Hala ere, XXI. mendean, emakumeen partaidetza oso txikia da informatikaren arloan, ingeniaritza teknikoetan edo eraikuntza-enpresetan, besteak beste. Bestalde, soldata askoz baxuagoak eta lan-baldintza okerragoak dituzten mendeko pertsonak zaintzen dituzten lanbide gehienak femeninoak dira, kontratuak tarteko badira. Egoera horri buelta eman behar zaio, eta hori da berdintasunerako legeen helburuetako bat, eta toki-mailan, berdintasunerako ordenantzaren helburuetako bat, gizartean aldaketak sortzeko tresna gisa, bai maila administratiboan, bai sozialean, berdintasunaren kultura bultzatuz”.
Ordenantza berri honek indarkeria matxistari buruzko lege-aldaketa berriak ere jasotzen ditu, hala nola biktimaren kontzeptua seme-alabetara, emakume transexualetara eta biktima den emakume bat defendatzeagatik erasoa jasan duen edozein pertsonara zabaltzea; indarkeria matxista jasaten duten emakumeen prekarizazio ekonomikoa prebenitzeko beharrezko baliabideak izatea; Emakumeen* Etxearen eta Jabetze Eskolaren funtzioa ere aitortzen da, emakumeen aurkako indarkeria matxista detektatzeko, arreta koordinatzeko, babesteko eta erreparatzeko ezinbesteko baliabide gisa.
“Berdintasunean aurrera egiteak esan nahi du etengabe hesiak eta kristalezko sabaiak hausten ari direla, ohiturak aldatzen, eta berekin dakar aliantzak bilatzea, eraikitzea eta berriz heztea, feminismoan zehaztutako helburu baterantz etengabe urratsak ematea. Norabide horretan urratsak ematen jarraituko dugu”, amaitu du Vazquezek.
