2025/01/21
2023ko udazkenean Gesoerrekako basoan ezkur bilketa egin zen herritarren laguntzarekin, hauek aurrerago landatzeko asmoarekin. Ezkur hauek Foru Aldundiaren mintegian hazi ondoren, landatzeko tamaina hartu dute eta Zingira basoan egingo dira landaketak.
”Zingiran bertan, partzela erosi eta artelatz basoa errekuperatzeko lanak egin genituenetik, 1.300 zuhaitz eta zuhaixka baino gehiago landatu ditugu. Horietatik batzuk, ez dira hazi eta orain, larunbateko landaketa honetan, ordezkatuko ditugu”, azaldu du Gloria Vazquez (PSE-EE) Eraztun Berde Urdineko zinegotzi arduradunak.
Hasiera batean, 100 bat zuhaitz landatzea aurreikusten da eta herritar batzuk jada izena eman dute ekintzan parte hartzeko, Eraztun Berde Urdinaren buletinaren bitartez ekimen honen berri jaso dutelako. “Aprobetxatu nahi dut herritarrak animatzeko gure buletinean izena emateko eta, horrela, martxan jartzen ditugun ekimen guztien berri jasoko dute euren helbide elektronikoan”, gehitu du Vazquezek.
Artelatza (Quercus suber) Zarautzen Arkamurka bezala ezagutzen da eta Getaria eta Zarautz inguruan zabalduta daude, Europako Natura 2000 Sarearen barruan babestuta. Babestutako eremu honen baitan, Zarauzko Udalak, zaindu eta zabaltzeko, erosi zituen Zingira eta Gesoerreka artelatz basoak aurkitzen dira,.
Garate Santa Barbara eremu hau, Eraztun Berde Urdineko garrantzi handiko interes puntua da, noski, eta bere mantenua eta zaintza kudeatzen ditu Udalak. Era berean, ekosistema hauek arrisku egoeran dauden animali eta landareak babesteaz gain, basoei esker itzala, zorua eustea eta higadurari aurre egitea, CO2 xurgatzea… lortzen da. Zarauzko Eraztun Berde Urdina aldaketa klimatikoari aurre egiteko egitura berdea da, babes klimatikoa ematen diona Zarauzko herriari.
Zingira basoan zuhaitz landaketa hau egiteko deialdia larunbatean, goizeko 10:00etan, izango da Vista Alegre parkeko Torreoitik abiatuta.
Ekintzan parte hartzeko izena eman beharko da 943 00 51 59 zenbakian edo zarautz@eraztunberdeurdina.eus helbide elektronikoan.
