2024/08/01
Hirietan bero olatuen aurrean beharrezkoa da babes klimatikoak aurreikustea eta horretan ari da Zarauzko Udala. “Helburu horrekin, Astiko bidean udaberrian 9 lizar landatu genituen eguzkitan zegoen bidearen parte batean. Jada itzala ematen dute eta askoz atseginagoa da bertatik pasatzea eguzkiak jotzen duenean. Espazio falta zegoenez, lanketa berezi bat egin behar genuen eta emaitza oso polita izan da”, adierazi du Gloria Vazquez (PSE-EE) Ingurumen zinegotziak.
“Eraztun Berde Urdinean ere landaketa desberdinak egin ditugu bertako landaretza berreskuratzeko, baina aldi berean, beroari aurre egiteko ere baliagarriak dira. Besteak beste, orain dela gutxi egin dira landaketa hauek Iritan, baina lehendik ere egin dira Igerainen, Buztinzurin, Gesoerrekan, etabar”.
Gure Eraztun Berde Urdinak babes klimatikoa eskaintzen du bero aldietan muturreko tenperaturei aurre egiten laguntzeko. Egun hauetako beroari aurre egiteko Eraztun Berde Urdinaren ibilbidean dauden aukerarik freskoenak honakoak dira:
– Igerain-Hiruerreketako ibilbidea. Zalantzarik gabe, egun beroetarako aukerarik freskoena da erreka bazterretik doan ibilbidea, eta herri gunetik gertuen dagoena.
– Buztinzuriko haltzadia.
– Vista Alegreko parkea.
– Santa Barbara-Mutxio jaitsiera.
Ibilbide hauek goizean goiz egitea gomendatzen dugu, eguerdiko orduak saihestuz. Era berean, uda osoan zehar irteera gidatuak eskaintzen ari da Udala natur gune hauek ezagutzeko eta irteera hauen ordutegiak egokituta daude eguneko ordu beroenak saihesteko.
