2025/01/29
Hezeguneen Nazioarteko Eguna ospatzeko, Eraztun Berde Urdina proiektutik ekimen berezia jarri dute martxan. “Otsailaren 1ean Hezeguneen Nazioarteko Eguna ospatuko dugu Itulazabalgo zuhaiztian. Bertan, urmael batzuk egokitu baitira pasa den abenduan, eta hauei arreta berezia eskainiko diegu”, adierazi du Gloria Vazquez (PSE-EE) Eraztun Berde Urdineko zinegotzi arduradunak.
Azken mendeetan zehar, eta, batik bat, gizakiaren jardueraren ondorioz, Europako urmaeletako bi heren desagertu da. Egoera hori aldatzeko asmoz, Zarauzko Eraztun Berde Urdinean bizidun urtarren kontserbazioa laguntzeko urmael sare bat sortu dugu, Aranzadi elkartearekin batera: Zingirakoa, Orokieta Herri Eskolakoa eta sortu berri den Itulazabalgoa.
Zarauzko urmaeletako biodibertsitatearen kontserbazio-egoera ezagutzeko, mantentzeko eta honen garrantziaz sentsibilizatzeko ikerketa, kudeaketa eta dibulgazio-lanak burutzen dira urtean zehar.
Ekintza hauekin batera, larunbat honetan, Itulazabalen egokitu berri diren urmaelak naturalizatzeko eta izaki bizidunek babes guneak izateko elementu naturalak (enborrak, harriak…) jarriko ditugu herritarrekin batera. Honez gain, mikro hezeguneek duten garrantzia azalduko digu Aranzadi Zientzia Elkarteko Ion Garin herpetologoak.
Abiapuntua Zarauzko Udal baratzeetan izango da, goizeko 10:00etan. Ekintza honetan parte hartu ahal izateko, aurrez izena eman beharko da, 943 005159 telefonoan edota zarautz@eraztunberdeurdina.eus helbidera idatziz.
Animatu eta eman izena!
Artelatzen landaketa
Bestalde, Vazquezek joan den asteburuan Zingira basoan antolatu zen artelatzen landaketara gerturatu ziren herritarrei eskerrak eman nahi izan dizkie: “Gure eskerrik beroenak eman nahi ditugu larunbat goizean artelatzen landaketa egitera etorri ziren herritar guztiei, Eraztun Berde Urdineko Zingira basoan. Eguraldia ez genuen alde izan, baina hala ere herritarrak gogotsu etorri ziren eta horri esker lan ederra egin genuen, giro ezin hobean. Lana bukatu eta gero merezitako hamaiketakoa egin genuen elkarrekin”.
