Duela hilabete baino gutxiago, Zarauzko Udal-baratzeak esleitzeko zozketa egin zen eta bertan lehen hamalau eskaerek baratzea lortu dute.
Zozketa horretan, erretiratuen eta pentsiodunen taldea lehentasunezko talde gisa ezarri zen baratzeko gainerako eskatzaileen aldean, eta, gaur egun, Zarautzen erroldatuta dauden eta erretiratuta edo pentsiodun izateko baldintza betetzen duten eskatzaile guztiek eskuratu dute erabilgarri dauden lursailetako bat.
Iazko ekainean 40 baratze baino gehiago esleitu zitzaizkien langileei, langabeei eta erretiratuei, itxaron zerrenda agortu arte. Aurten, berriki esleitutakoez gain, zozketaren ondoren itxaron-zerrendan sartu ziren pertsonei ere emango zaizkie libre geratzen direnak.
Martxoko osoko bilkuran onartutako araudiak ez du alegaziorik jaso, eta, beraz, Gipuzkoako Aldizkari Ofizialean argitaratu eta hamabost egunera jarriko da indarrean.
Araudia eguneratzearen ondorioz, Patxi Elola (PSE-EE) udal-baratzeen proiektuaren ardura duen zinegotziak adierazi du “oso pozik” dagoela “baratze guztiak martxan daudelako eta pentsiodunei eta erretiratuei partzelak esleitzea lortu delako”.
“Udal gobernuko alderdiek onartutako araudi berri honek ez zuen kontrako botorik jaso, eta baratze eskatzaile berriei bizkortasunez erantzuteko diseinatuta dago”, gogoratu du Elolak. “Erabilera antolatzen duen tresna berri bat da, eta zenbait erabiltzailek egiten dituzten erabilera txarrekin amaitzeko balioko du, hala nola, baratzeak hirugarren pertsonei lagatzea, bizilagunen baratzeak inbaditzen dituzten maskotekin joatea, pasabideak okupatzeko edo baratze kolektibo baten berezko ez diren egiturak eta materialak pilatzea, non 180 erabiltzaileren arteko bizikidetza helburu garrantzitsuenetako bat den”.
Duela 11 urte sortu zenetik, Zarautz biztanle bakoitzeko baratze publiko gehien dituen Gipuzkoako udalerria da, eta aitzindarietako bat da baratzezaintza zaleentzako lur publikoa eta doakoa herritarren eskura jartzen.
