2025/08/27
Zarauzko Udaleko Ingurumen departamentuak “Bertatik bertara eta garaian garaikoa” kanpaina martxan du eta orain udako txanda heldu da. Kanpainaren helburuak kontsumo jasangarriko ohiturak sustatzea eta bertako ekoizleak babestea dira.
Kanpaina 4 fasetan banatuta dago, urtaro bakoitzeko txanda bat eta, orain, udako kanpainari dagokio tartea. Guztira, 5 panel jarri dira udalerriko hainbat kokapenetan, sasoiko 5 produkturen argazkiekin, kanpainaren leloarekin eta sustatu nahi diren kontzeptuekin: osasungarria, jasangarria eta tokiko ekoizpenarekin konprometitua.
Gainera, fase bakoitzean, udalerriko nekazaritza-ustiategietan egindako bideo bat ikusi ahal izango da GUKA Telebistan, eta beste batzuk laburragoak izango dira sare sozialetan.
Ingurumen zinegotzi Inaxio Illarramendik (PSE-EE) nabarmendu duenez, “Txanda honetan, hauek izango ditugu bidelagun: batetik, Mari Mar Manterola eta Iñaki Olaizola, Argoin Txiki baserriko nekazariak, eta, bestetik, Amaia Gurrutxaga Uranga, kazetaria eta merkatuko bezeroa. Guretzat oso garrantzitsua da kontsumo jasangarria sustatzea, bertatik bertara eta garaian garaikoa kontsumitzea, bai ekoizleak eta bai kontsumitzaileak aktibatzeko eta, azken finean, lehen sektorea bultzatzeko. Herritarrak animatzen ditugu sasoiko eta tokiko produktuak kontsumitzera”.
