2025/08/28
Gaur argitaratuko da Berdintasun departamentuaren Youtubeko kanalean “Toldopeko ahotsak” proiektuaren bigarren edizioaren azken atala. Joan den udan abian jarritako ekimena da hau, emakumeei bizitzako hainbat arlotan dituzten esperientziak kontatzeko ahotsa emateko.
Azken atal honetan, Zarautzen bizi diren bi emakume afganiar izango dira protagonista, Afganistango emakumeen egoera aztertzeko. Honez gain, datorren irailaren 17an, 19:00etan, Zarauzko Modelo Aretoan mahai-inguru bat egingo da gaurkotasun eta garrantzi handiko gai honetan sakontzeko.
“Afganistango emakumeei beren oinarrizko eskubideak larriki urratzen ari zaizkie, eta laguntza behar dute. Ia ez dute kanpoko mundurako sarbiderik, ezta sare sozialen bitartez ere, baina munduak beren egoera ezagut dezan nahi dute. Horregatik, ahotsa eman nahi diegu eta jasaten ari direna salatu”, adierazi du Gloria Vazquez (PSE-EE) Berdintasun zinegotziak.
Mahai-inguruan Zarautzen bizi diren eta podcastean parte hartu duten bi emakume afganiarrek, Madrilen bizi den Khadija Amin kazetari eta aktibista afganiarrak eta Haurralde fundazioko ordezkariek hartuko dute parte, eta Olga Grande kazetariak zuzenduko du topaketa. Irekiera instituzionala Gloria Vázquez Zarauzko Udaleko Berdintasun zinegotziak egingo du eta itxiera Ana Priede Gipuzkoako Foru Aldundiko Lankidetza zuzendariak.
Seigarren eta azken atal honekin amaitzen da “Toldopeko ahotsak” ekimenaren bigarren edizioa. Bertan, Zarauzko hainbat emakumek gai desberdinei buruzko bizipenak eta gogoetak partekatu dituzte, hala nola bidaiak, landa-mundua, amatasuna, emakume etorkinek etxean egiten duten lana eta, oraingo honetan, emakume afganiarren errealitatea.
Edizio honetako atal guztiak Zarauzko Udaleko Berdintasun departamentuaren Youtubeko kanalean ikus daitezke.
