2022/10/27
2019an, Zarauzko Udaleko Ingurumen Arloak ondoko bi lurzati erostea sustatu zuen, ingurumen-balio handikoak, Garate-Santa Barbarako eremu babestuaren barruan, Europako Natura 2000 Sarean. Bi lursailek 3,8 hektareako azalera hartzen dute, eta artelatz-masa handia dute kontserbazio-egoera onean, beste pinu-eremu batzuekin eta beste espezie batzuekin batera. Lurzati horiek 84.138 euroko balioa izan zuten guztira.
Natura 2000 Sarearen barruan lurrak erosteko helburu nagusia Udalak esku hartzeko gaitasuna izatea da, horrela Garate-Santa Barbarako eremu honetako artelatz-basoak lehengoratu eta mantendu ahal izateko, biodibertsitatea mantentzeko eta, aldi berean, Zarauzko baso-masa handitzeko, klima-aldaketari aurre egin ahal izateko.
Gesoerrekako artelatzak zaharberritzeko lanak oraintxe hasi dira, Gipuzkoako Foru Aldundiko Ingurumeneko eta Obra Hidraulikoetako Departamentuak ematen duen ‘degradatutako eremuak berreskuratu eta leheneratzeko eta azpiegitura berdeak hobetzeko laguntza’ programaren bidez, eta 28.341,80 euro eman zaizkio Zarauzko Udalari proiektua idazteko eta, ondoren, gauzatzeko.
“Eskerrak eman nahi dizkiot José Ignacio Asensiok zuzentzen duen Sailari Zarauzko Udalarekin izandako lankidetzagatik, dirulaguntza hau eman baitigute gure udalerriko basoko lursail horiek lehengoratzeko”, eskertu du Gloria Vazquez Ingurumen zinegotziak (PSE-EE).
Esku-hartzearen azken helburua artelatza lehengoratzea edo berreskuratzea da. Horretarako, kasu batzuetan beharrezkoa da espezie exotikoen aleak kentzea, batez ere monterrey-pinua eta sasiakazia. Halaber, artelatzak landatu ahal izateko soilguneak irekitzea planteatzen da, eta ia 400 metroko itxitura bat jarriko da, sartzeko bi aterekin.
Espezie exotikoen ordez artelatzak (Quercus suber), haritz arrunta (Quercus robur), ametza (Quercus pyrenaica) eta gurbitza (Arbutus unedo) jarriko dira. Guztira 500 zuhaitz eta zuhaixka inguru landatuko dira, eta horietatik 302 artelatzak izango dira. Ez da inola ere esku hartuko malda handiko eremuetan, higadura-arrisku handia dagoelako, eta egin beharreko lan guztiak kontu handiz egingo dira, mantendu beharreko alerik ez kaltetzeko.
Guztira, Zarauzko Udalak 9 hektarea erosi ditu Garate-Santa Barbarako naturgunean, 3,8 Gesoerrekan eta gainerakoa Zingirako basoan, 170.558 euroko inbertsioarekin, gure Eraztun Berde Urdina aberastuz eta haziz.
“Ingurumen sailean oso pozik gaude artelatzak lehengoratzeko lan horiekin, eta, horrela, baso horretako biodibertsitatea berreskuratzen eta hobetzen laguntzen dugu. Natura 2000 Europako sarearen barruan babesten da baso hori”, gehitu du Vazquezek.
Zinegotziak gogorarazi duenez, “basoen kontserbazioa ere funtsezkoa da klima-aldaketaren aurkako borrokan. Ingurumen sailaren neurri estrategikoa da; izan ere, badakigu oso garrantzitsua dela CO2 xurgatzea, airea garbitzea eta bizitzarako funtsezkoak izatea, eta, gainera, kutsaduratik babestea”.
