2021/07/14
Sei urte dira Zarauzko Baratze Solidarioaren proiektua hasi zela. Bertan, Zarauzko Udalak Caritasi utzitako lursail batean, hainbat boluntariok mota guztietako barazkiak ereiten dituzte elikagai-bankurako, eta, ondoren, behar handiena dutenei jaten ematera zuzentzen dituzte.
Boluntario talde batek, gehienak erretiratuak, hainbat urte daramatzate elkarlanean euren denbora librean barazki freskoak ekoizten, Astiko udal-lursailean modu ordenatu eta metodikoan hazten direnak.
Baratze Solidario honek janariz beteriko 40 otar inguru hornitzen ditu asteazkenetan, eta, horri esker, beste horrenbeste familiak lehen mailako elikagaiak eskura ditzakete astero.
Jolas enpresa zarauztarrak, besteak beste, haur-parkeak eta hiri-altzariak ekoizten eta instalatzen ditu, eta proiektu solidario horretan lagundu nahi izan du, doan, plastiko birziklatuz sortutako 4.000 kilo material emanez, barazkiak ekoizteko behar den azpiegiturak sortzen laguntzeko.
“Baratzeen kudeaketan plastiko birziklatua erabiltzea beharrezko urratsa da nekazaritza-erabilerako hondakinak sortzea saihesten laguntzeko. Baratze solidarioetan ere berrerabilpena, birziklapena eta materialen murrizketa erantzukizun instituzionalak zuzendu behar ditu”, azaldu du Patxi Elola (PSE-EE) Udal Baratzeen zinegotzi arduradunak. “Hori dela eta, beharrezkoa zen sinergia sortzea, Baratze Solidarioetako boluntarioek bertako enpresa batek emandako birziklatutako elementuak erabiltzen has zitezen”.
“Baratze Solidarioa ekimen bikaina da, hainbat boluntarioren artean egiten dutena, eta Jolasek bere alde egin nahi izan du aurrera egiten laguntzeko”, esan du Iñigo Isasti Jolas enpresako Zuzendari Komertzialak. “8.000 euroko balioa duten 4.000 kilo material horiek bankadak, etxolak, konposta gordetzeko ontziak… osatzeko balioko dute, eta materialaren iraunkortasunari esker, proiektu honen etorkizuneko garapena erraztu eta lagunduko dute”.
